ANGELA: Kifer to koumans interese ar moi enn kou? Ki mirak?
ARJOUNA: Mirak! To mo belser Angela. Mo belser. Fam mo frer.
ANGELA: Veritab mirak. To finn dekouver sa tousel! Inpe anretar, to pa koir?
ARJOUNA: Anretar! Angela, ki to'le dir ?
ANGELA: To konn bien. Dan to lizie, dan lizie to fami zame mo ti enn fam dign
pou to frer. Pa mem jati.
ARJOUNA: Pa vre sa. To kone pa vre sa.
ANGELA: Seki mo kone, zot finn fer tou pou fer mo mari kit moi. Moi ek enn ti
baba sis moi.
ARJOUNA: Me …
ANGELA: Mo pa ole diskit sa ar toi, me si to insiste, mo kapav dir toi detroi
laverite.
ARJOUNA: Angela, tansion li vinn enn kou.
ANGELA: Les li vini. Les li tande. Mo pa ena nanye pou kasiet ... To kone ki
to frer ti ena enn karakter feb. Li les so fami inflians li. Me si toi to ti
pran pozision, si to ti sayde ar li, li ti pou ena kouraz reziste to papa ek
to mama. Me to ti prefer res trankil. To silans ti vinn konplis to paran kont
moi. Troi kont enn. To frer sede ... Kan to ti kapav fer kiksoz to ti res trakil.
Aster to rod fer moi koir ki to interese ar mo lekzistans. Tro tar mo ti Jouna.
Tro tar.
ARJOUNA: Me ar li, ar sa mons la!
ANGELA: Wi Jouna, sa mons la ti vinn prezat li kan manze mo pa ti ena. Sa mons
la, li pe nouri to neve depi troi moi. Kan mo ti bizin led to pa ti la. Aster,
to vinn pres sermon.
ARJOUNA: To ere koumsa?
ANGELA: Ere! To ankor enn zanfan mo ti Jouna. Li ena rezon.
ARJOUNA: Kisannla?
ANGELA: To prizonie danzere. Toultan li dir ki fale ena liberte pou kapav ena
boner. Me pou enn fam, ki liberte kapav ena. Nou destin amare ar kapris bann
zom. Me sa pa kapav kontinie. Li ena rezon. Kikfoi samem li dan prizon. E toi,
to vey li kouma to ti vey mo prizon.
