RAWANA: Fer toi atansion ar li. Mo ena soupson ki li enn espion. Me mo pa ankor
gagn ase prev pou fer pins li ... Mike! Sa zame li pou sanze. So zafer ar li.
Mo finn rod donn li enn dernie sans. Aster mo pou fini li.
ARJOUNA:(Donn
linpresion li pe fer enn jok.) Li osi lor ou sime Serzan?
RAWANA:(Fer
koumadir li pa finn tande. Get so mont.) Troizer-moin-vennsek!
Troizer relev pou vini. Bizin fer vit ...
ARJOUNA: Bizin fer vit ?
RAWANA: Hin!... Wi, bizin met tou korek avan nou ... To sir telefonn la pa finn
sone dezer-edmi?
ARJOUNA: Wi sef. Si li ti sone, mo ti pou tande.
RAWANA:(Koumadir
dan enn rev.) Savedir lalimier ver finn alime. Koutkekout
lalimier rouz bizin tingn.
ARJOUNA: Lalimier ver? Lalimier rouz?
RAWANA: Bon, chek enn kou si tou korek dan
biro. Letan sa mo al donn li so dite ... (Silans.) Donn
moi lakle kaso nimero kat. ... (Arjouna ouver larmoir,
tir enn lakle, donn li). Pa bliye enn polisie so travay bizin sasi.
Si to konn donn to sef satisfaksion, tou pou korek, sinon ... (Li
sorti par laport agos).
