|
Senn 10
RAWANA: Dezer! Bizin telefonn "Headquarters".
(Li lev resepter). Alo,
alo ... Wi Serzan Rawana, Detention Centre... Alo
... Ou kapav koz inpe for, pa pe bien tann ou...
Wi, pe okip li kouma bizin ... Inpe feb ... ankor
lagrev lafin ... Apart sa tou korek ... Yes Sir
... Pardon? Non peyna traka. (Li
poz resepter.) Ki
pe arive ar bann sef? Zot reponn telefonn, zot
dimann so nouvel. Kifer li finn vinn sitan inportan?
... Mo sir bann grevis finn krak zot lalign....
Wi, zot pa sir kouma evennman pou devlope. Zot
ole pran prekosion de kote. Me ar moi sa pa marse
... Mo veritab sef, li pli lao ki sa bann kapon
la ... Li, li kone ki bizin fer. Seki li dir, samem
... Arjouna, mo kamrad. Nou lor bor enn evennman
ki pou amenn soi lagloir ek pouvoir, soi lamor.
... Wey Arjouna, to pou bizin soizir. To kapav
soi vinn moter sa evennman la, soi so frin; soi
to lor mo sime, soi to ar moi ... To nek ena pou
dir wi, mo zenn Arjouna. To laferm, dime mo fer
toi gagn li.
ARJOUNA: Sis pie par kat.
RAWANA: Hin! To tro intelizan. Mo sir to
pou konn soizire. (Li pe balote inpe.)
ARJOUNA: Asize, Serzan.
RAWANA: (Li
get so mont). Dezer-dis. Me kot Mike? Mo ti dir li, li bizin
retourne dezer. Tou finn drese pou dezer-edmi. "Wi, Serzan, kapav kont sur
moi" A! Kot li foutou! Si dan larme sa, finn fini "kortmarsial" li.
Mo tro bon ar li. Mo finn kasiet so pese, ala ki manier li remersie moi. (Kikenn
tap laport). A! anfin! (Li al vit pou ouver
laport) ... Toi sa!
To pa finn trouv misie Mike lor sime?
|
