(Rawana tousel.
Li souy so figir ek so likou ar enn mousoir.
Li pe transpire. Li boir inpe depi dan flask
la. Lefe laboison la koumans paret. Deplizanpli
so lalang pou koumans amare. Deplizanpli li pou
vinn brital, mem vilger. Detanzantan li pou boir
inpe ziska lafin pies la).
RAWANA:Pa
gagn droi boir? Kisannla kapav anpes moi. Moi
ki sef isi ... Enn laferm! ... Lapolis pa bon
pou gran misie la …. Lindepandans!
.... Gran-gran lide! ..... Koumadir li pli fezer
ki so kamarad li.(Li
pran liv Arjouna, zet li lor latab ar degou). Trouve
sa bann zenn ki finn nouri dan boit koton. Zot
pa kone ki apel lamizer. Zot pa kone ki apel souse
pou gagn enn travay. Lindepandans! Letan moi mo
ti pe fer lager pou defan so lindepandans ki li
ti pe fer? Li ti pe zoue, ansekirite. Aster li
vinn koz lindepandans ar moi. Mo finn riske mo
lavi pou dimoun kouma li. Komie mo finn bizin touye
.... liberasion ... Nou tro mou ar zot.(Boir
inpe)
...Arjouna,
ki to pe fer? ... Lindepandans!…Liberasion!… gran
koze !... Tou sa bann sakrifis, tou sa bann travay
malprop ki mo finn bizin fer ! Wi misie, non misie … Aster,
ler mo finn ariv pre kot mo bit (Li
trap revolver la, kares li),zot
vinn ar moi ar zot gran-gran koze. Personn pa pou
dibout lor mo sime.(Li
poz revolver la ar prekosion lor latab) ...Arjouna!
Arjouna!
