Zoizo Samarel

Enn peser-labourer dan vilaz Samarel,

Dan gri-gri gramatin kan bann fe dan lesiel

Finn kasiet zot palet, ramas kot son lafnet

Enn zoizo plim mouye ki pe mor lamor bet.

Vit-vit li souy li sek, anvlop li ar linz so,

Ar kouyer fer li boir detroi gorze dilo

Pou sov lavi zoizo lesiel-later-lamer

Ki finn grandi lao lor montagn set kouler.

Ler tanto arive ar labrim ti lapli

Zoizo mingi-mingi pa tann lapo kabri;

Dan enn koin so pagne li pe fixe dan vid,

Respire pa fasil kan lavi finn lasid.

Nou perser-labourer pas lanouit pou vey li,

Konsol li, soulaz li, redonn li gou lavi.

Ler gramatin vini so lizie ferm tousel,

Dan enn rev fantastik li pe bat so lezel.

Dan lesiel Samarel; dan lebra so zoizo

Lor enn vag Nirrvana zot pe bingn dan dilo

Kolorie ar pinso bann zepis parfime…

Ler so somey kase zoizo finn anvole.

Dan so plas enn prinses lor enn tronn kler-de-linn,

Bote lebenn dan enn sari lasoi-de-sinn

Pe sant lamour. Enn gran roulman lapo kabri

Anvlop so nam ar sawal nouvo melodi.

Bann zoizo Samarel dan lesiel set kouler

Finn aprann so sante, bann poison dan lamer,

Tou bann pie lor montagn anker pe sant ansam.

Nouvo poem kram-kram aster pe donn lagam.