Fiat Lux

tapisri finn mouye ar brouyar

pil ek fas vant lor vant pe bouz fix

bann fey finn kol-kole lor bann brans

bann brans finn kol-kole lor bann pie

bann pie finn kol-kole lor montagn

montagn finn kol-kole lor lesiel

kouma enn gran feyte lesiel gri

gondole pe grene e lemonn

madriye enn fourtou-makatcha

pe anfle so tekoi ar diilo

voil mouye kouma enn pov kadav

ki finn noiy dan brizan tas dan kav

Letansa Kromayon pe dekor so lakav,

Panini pe invant gramer iniversel,

Sigmund Freud pe dialog ar Sofok,

Leonard Da Vinci ek Icare pe desinn enn avion,

Bistouri dan lame Ipokrat

Pe detas fey par fey;

Lord Shiva pe diriz enn bale;

Zezi Kri pe donn nesans enn verb.

Fiat lux!

OM