|
O Dek
O dek!
Enn serindikap ek enn kardinal
Pe kourtize
lor enn brans filao.
O dek!
Troi ti lapin blan ar zot lizie rouz
Pe zoue-zoue
lor lerb ver dan bor dilo.
O dek!
Kat tipti pousin blan, noir, zonn, maron
Ansam
pe fouy later pou rod lever.
Bat to tanbour tanbourye!
Tap
to ravann ravannye!
Les
lapo kabri gazouye!
O dek! Enn bengali pe sante lor enn fler,
Ki leze
kouma enn papyon dore.
O dek!
Fler kann velour pe danse dan lezer,
Li pe
valse ar lamizik lesiel.
O dek!
Zoizo kolorye gazouy-gazouye
Pe patine
lor ledo larkansiel.
Bat to tanbour tanbourye!
Tap
to ravann ravannye!
Les
lapo kabri gazouye!
O dek! Niaz pe anvlop montagn ar so kares,
So
lonbraz pe rafresi tou bann fler.
O dek!
Enn boul dife lor pe al boir dilo,
So kouler
pe pintir nou liniver.
O dek!
Lalinn kouler larzan pe zoue yoyo
Ar bann
zetoil diaman lao-lao.
Bat to tanbour tanbourye!
Tap
to ravann ravannye!
Les
lapo kabri gazouye!
|
