Dife dan Kann

Bann lalang rouz-oranz-lor pe danse dan lorizon

Anflame. Kouma serpan disan zot pe ranp ver

Lesiel mov. Marenoir pe vini.

Freser ar so gran kapot

Pe anvelop vilaz san lalimier, san lespoir

Ar so bordir karo kann.

Dife ki pa pirifie, dife ki pa sofe

Dife ki pa amenn lavi,

Dife ki pa detrir,

Dife dan kann,

Dife ki amenn

PROFI.

Li amenn ni koumansman, li lafin.

So laflam kouma bontan dan siklonn.

Menase, grongne, grinse, kriye,

Sifle, irle, krake, ronfle, rabase.

Boukou kouler, boukou mouvman me

Kouma enn miraz li disparet

Pou les tou parey kouma avan.

Chiniraja pe ranpli so poumon ar goudron.

Government warning, smoking

May damage your health.

Li fer enn sourir san konpran.

Enn lafnet dan so labous

Montre so lalang rouz

Deryer ledan zonn nikotinn.

Li plonz dan lamer noir lapay brile;

Lasann profi pe voltize dan lezer.

Kouma tourbiyon li anserkle so lipie,

Mont ziska so nene.

So lakras noir fer mastik

Dan so lagorz;

So poumon ranpli ar goudron;

Dan enn touf fey karbonize

Enn lonbraz pe sirkile

So laserp dan so lame.

So liniver kouma sarbon,

Lasann profi finn vinn mari.

Lenerzi farata-kari-pomdeter

Pe koule lor so fron

Simiz perkal kole lor so ledo.

Lasan profi ek transpirasion Chiniraja

Pe kol realite ar enn mastik.

So poumon ranpli ar goudron.

Government warning,

Smoking may damage

YOUR HEALTH.

Chiniraja

Pa

Anvi

Riye.