Pa dife ki kras poizon dan
lesiel deza malad; pa labrez ki kouma tret anba
lasann, bril lipie, anflam soufrans; pa etinsel
ki pet anler dan gran fraka me tingn vit-vit, fre
ek steril; pa laflam fezer ki fer so vantar ar
lekiri, bril enn vas ek so baba.
Non, non,
non. Enn lot dife. Enn dife kouma enn poumon
kosmik ki ponp laflam veloute refroidi par lamour
invizib, partou san les enn mikron sape; enn labrez
nouri ar manteg ek sanbrani ki parfim lespas; enn
etinsel ki alim lavi e gid so pa pou li retourn
dan vant koumansman; enn laflam sakre permanan
ki partou anmemtan ek ki tras sime Listoir san
touf liberte.
Limem mo Senier, lasours
mo lavi, lasours kot enn zour mo pou al boir ...
si mo Senier apel moi.
