Zistoir enn fler

Nek plonz to nam dan fon lamer

Si to'le konn zistoir enn fler

Ki finn ouver so bann petal

Dan enn gran tourbiyon rafal. 

Si to'le konn zistoir mo fler

Tranp to lespri dan lamer kler. 

Lontan-lontan enn gramatin 

Dan koumansman so gran destin

Douler-douser dan vant later

Ti donn nesans enn bout later.

Dan bout later enn zoizo brin

Ti vinn depoz enn ti lagrin. 

Lerla bann flev lor nou later

Plonz zot lespri dan fon lamer

Pou tras ansam sime Listoir 

Pou ranz lespoir ar dezespoir.

Dan profonder destin amer 

Tou larivier zot rev mem fler. 

Dilo Lasenn, Laloir, Nizer 

- Dan profonder destin amer -

Dilo Ganga ek Zambezi

Ponnaïyarr, Godavarri,

Flev Yangtze Kiang, tou larivier

Ar zot lespoir aroz mem fler. 

Tou bann dilo finn melanze, 

Li bet aster sey separe! 

Nou bout later finn donn enn fler,

Nou selebre so lalimier.

Olie tir lay ar lepase 

Nou dir ansam " Mersi BonDie " .