Chiniraja

Chiniraja ki to pe panse?

Barlizour timid pe ouver so lizie

Pou fer laroze glase briye

Ar freser mat gramatin

Lor fey kann ki finn kasiet

So kouler dan marenoir.

Lavi pe leve, somey pe kase.

Chiniraja ki to pe panse?

Lapay sek anba to lipie pe kriye,

To pa tande.

Lapousier roz bes latet, zet lekor al kraze

Lor feyaz, to pa trouve.

Fangourin later, pe aroz ler

Ar parfin sikre, to pa santi.

Lor enn mel divan toi

De perdri trakase pe pare

Pou anvole, to pa kone.

Lavi pe leve, somey pe kase,

Chiniraja ki to pe panse?

To bann frer kouma toi pe bese, pe leve

Kouma pantin

Pa tande, pa trouve, pa santi, pa kone,

Zot tou parey.

Loto la arete, kolon la diboute

Bonzour misie.

To lame pe leve, pe bese, pe leve

Kouma masinn.

Soley out demi-tied pe lite ar enn niaz.

Ayo bondie!

Dive kann antere partou kot li gagne.

Sa mo destin!

Sirdar la lor enn ros diboute pe donn lord.

Sa do destin!

Manejer lor balkon so lame dan so pos,

Li satisfe.

Lavi pe leve, somey pe kase.

Chiniraja ki to pe panse?

Divan finn balye niaz,

Soley out gonfle so

Lestoma, avoy so

Lalimier lor ledo

Tabisman.

To bann frer lev latet

Get lesiel fer sourir.

Bann fler kann divan toi

Pe danse ar kouler

Lalimier.

Bann fey sek pe sante

Ar kadans to mouvman.

Enn jalsa pe monte

Ar siro linite

Dinite.

Zot tou pe tourn ver toi;

Lamizik akorde;

Enn sel not pe manke

Pou ki toi ek leres

Vinn enn sel.

Lavi pe leve, somey pe kase.
Chiniraja ki to pe panse?