Tata Iranah

Anba pie tamarin kan peyna pou'al lekol

Mo Tata Iranah, enn ti-frer mo granper,

Atir tou bann zanfan - bann marmay fer laronn

Kouma grap mous dimiel otour fler roz vieyfi

Pou nouri rev sekre kot ti-bout manz gro-bout -

Pou fer nou viv ansam atraver lang Kreol

Zistoir bolom loulou, Tizan gran debrouyar,

Zistoir gato kanet, yev dan basin leroi.

Mo Tata Iranah depi bien-bien lontan

Finn kit nou, finn ale. Enn gran lakaz beton

Dan plas pie tamarin pe sey efas memoir

Ti-garson Foukalind ki ti aprann reve,

Ki ti aprann koze, ki ti aprann panse

Anba pie tamarin. Peyna pli bon lekol.