Mo koir li ti servi bann zoizo sovaz migrater
pou kit so planet. Gramatin avan so depar, li ti
met lord partou lor so planet. Ar boukou soin li
ti ribor bann volkan anaktivite. Ti ena de volkan
anaktivite. Sa ti bien pratik pou sof manze gramatin.
Ti ena osi enn volkan mor me kouma Ti-Prins ti
kontan dir, zame sir ar zot. Alor li ti prefer
ribor osi volkan mor la. Enn volkan ki bien ribore,
so laflam li dou ek regilie. Li pa pete ousa kras
dife. Enn volkan li kouma lasemine lizinn. Malsans
pou nou lor later nou tro tipti pou ribor nou volkan.
Akoz samem nou gagn enn ta traka ar zot.
Ti-Prins ti osi ras bann nouvo pous baobab. Ti ena tristes dan so leker parski
kikfoi dernie foi li ti pou fer sa. Me sa gramatin la, tou so bann louvraz normal
ti ena enn bon gou. E kan ler ti vini pou aroz so fler enn dernie kou e met bol
transparan pou protez li, li ti santi for enn lanvi plore.
- Salam, li dir so fler.
Fler la chomtayt.
- Salam! Li ti repete.
Fler la ti tous enn kou. Pa koir li ti gagn lerim. Fler la ti dir li:
- Mo'nn fane. Pardonn moi. Sey viv ere.
Ti-Prins ki ti pe atann parol repros pa'le koir so zorey. Bol transparan dan
lame, li diboute kouma enn gounga. Pa fasil pou konpran kot otan zantiyes sorti.
Fler la ti dir li lerla:
- Me wi, gate, mo kontan toi. Mo move manier finn gat tou. Pa fer nanye. To'si
to'nn fane to kone? Sey trouv to boner lot kote. Zet bol la. Nepli neseser.
- Me labriz …
- Pa koir mo'nn gagn lerim. Toumanier ler fre pou bon pou moi. Pa bliye! Mo enn
fler.
- Bann zanimo …
- Les seni vinn kot moi. Sa pou permet moi trouv papiyon. Tann dir zot mari zoli.
Mo pou bizin konpagni. To pa pou la toi. Bann gro bebet? Dir zot vini. Mo pa
per zot. Pa bliye, mo ena mo grif.
Naivman li ti montre Ti-Prins so kat pikan. Lerla li ti azoute: - Aret kol-kol
ar moi. To'nn deside pou ale. Ale!
Li pa ti'le ki Ti-Prins trouv li pe plore. Li ti ena so fierte fler.
