Ah! Ti-Prins, mo finn, tigit par tigit, konpran
to tristes-solitid. Pandan bien lontan, zis kouse
soley ti kas monotoni to lavi. Mo ti konpran sa
gramatin katriyem zour ler to ti dir moi:
- Mo kontan get soley kouse. Tonton, amenn moi get soley kouse.
To ti trouv drol dabor. Ansouit to ti riy tomem.
E to ti dir moi:
- Mo bliye mo pa kot moi.
Li vre ki, kan midi sone dan Lamerik, dan Lafrans
soley pe kouse. Tou dimoun konn sa. Si enn Amerikin
kapav sort Lamerik al Lafrans dan enn minit li
pou trouv soley kouse. Malsans, Lafrans bien
loin ar Lamerik. Me lor to ti planet to nek ena
pou bouz to sez detroi pa e get soley al dormi
kantite foi ki to ole.
- Enn zour mo ti get soley kouse karanntroi foi
Inpe pli tar to ti azout sa parol la:
- To kone tonton … enn dimoun tris kontan get soley kouse…
- Sa zour la … to ti bien-bien tris, non?
