Ti-Prins: Sapit 3

Ti pran moi boukou letan pou konpran kot li ti sape. Ti-Prins ti pe poz boukou kestion me ti zoue sourd ler mo ti poz li kestion. Detroi mo sap parsi-parla ti met moi lor lapis. Par ekzanp ler li ti trouv mo avion (pa kont lor moi pou mo desinn mo avion; tro konplike pou moi) li ti dimann moi:

- Ki ete sa zafer la?

- Pa enn zafer sa. Li avole. Samem apel avion. Mo avion sa.

Mo ti fer mo fezer montre li mo kapav anvole. Ki li dir ou koir?

- Alor, to finn sap dan lesiel, tonbe?

Dir ou mo ramas mo lake.

- Inpe koumsa!

- He, mari komik!

Ti-Prins larg enn riye inosan. Mo manz mo kou. Mo pa dakor ki kikenn pran mo problem anbadinaz. Lerla li dir:

- Alor toi'si to sort dan lesiel! Dan ki planet to viv?

So parol ti ekler mister ki ti finn amenn li isi e direk-direk mo poz li enn kestion:

- To sort dan enn lot planet?

Komdabitid, li ti fou moi sek. Bouz-bouz so latet dousman, li fixe mo avion.

- Tou manier ar enn zafer koumsa to pa kapav sorti loin. …

Pandan enn bon bout letan, li ti voiyaz dan so prop lespri e rant dan rev. Pli tar li tir mo mouton dan so pos e koumans admir so trezor.

Met ou dan mo plas. Mo ti anvi tir linformasion lor 'bann lezot planet'.

- Kot to sape mo ti bonom? Kot to reste? Kot to'le amenn mo mouton?

Li ti pran boukou letan pou sorti dan so silans meditatif:

- Li korek sa kes ki to finn donn moi; asoir li kapav dormi ladan.

- Biensir! Si to fer bon, mo pou donn toi enn lakord pou atas li dan lazourne e enn pike 'si.

- Atas li? To komik tonton.

- Si to pa atas li, li pou al trene e li kapav perdi.

Ala li reriye!

- Me kot to'le li ale?
- Ninport kotsa. Droit divan li.

Ti-Prins revinn serye.

- Kaspalatet! Peyna boukou plas kot moi.

E ar enn ti tristes dan so lavoi li kontinie:

- Tou manier si li mars droit divan li, … li pa kapav al loin kot moi.