|
Ti-Prins: Sapit 2
Ala kifer mo ti pe viv tousel san vre kominikasion
ar lezot ziska ki enn zour, ena si-zan desela,
mo ti gagn enn pann dan dezer Sahara. Enn zafer
ti kase dan mo moter. Pa ti ena ni mekanisien,
ni pasaze. Tousel mo ti pe bizin debrouy mo difil
ar enn pann serye. Li ti enn kestion lavi-lamor.
Ti ena dilo pou forse wit zour.
Premie soir la, mo ti dormi lor disab, loin-loin, plis ki mil mil ar sivilizasion.
Mo ka ti pir ki enn nofraze lor enn rado omilie enn losean. Aster sey mazinn
sok ki mo ti gagne kan boner gramatin, enn lavoi kas mo somey.
- Tonton, desinn enn mouton pou moi!
- Hin!
- Desinn enn mouton pou moi …
Mo dibout brit vadire loraz ti finn tom lor moi. Mo frot mo lizie detroi foi.
Pa manti, divan moi ti ena enn tibout bonom extra ki ti pe fixe moi. Pli tar
mo ti sey fer so portre. Bien maf! Normal! Bann gran dimoun ti touy mo talan
pint. Depi laz si-zan, apart lelefan vizib ek invizib dan vant boa, mo pa ti
konn fer nanye.
Mo lizie ouver gro ler mo ti trouv sa espes mirak la. Pa bliye ki mo ti plis
ki mil mil distans depi sivilizasion. Alor dir moi kimanier mo tibout bonom pa
ti paret perdi sime, fatige, fin, soif ousa per. Pa koir li ti kouma zanfan abandone
omilie dezer, mil mil distans depi sivilizasion. Ler mo reysi koze, mo ti dir
li:
- Me ki to pe fer la tibonom?
Li ti repet mem parol, lantman me serye-serye:
- Tonton, desinn enn mouton pou moi.
Kan sitiasion tayt, pa kapav kil parad. Tousa paret fouka net. Plis ki mil mil
distans depi sivilizasion, kan lamor pe fer letour, ki ti mo fer? Mo ti tir enn
fey papie ek enn plim dan mo pos. Lerla mo rapel ki apart zeografi, istoir, arismetik
ek gramer mo fos dan tou lezot. E mo ti dir mo tibout bonom (Mo pa kasiet mo
ti agase) ki mo pa ti konn desine. Li ti reponn:
- Pa fer nanye, tonton. Desinn enn mouton pou moi.
Kouma zot kone, mo pa ti konn desinn enn mouton.
Alor mo refer mo premie desin: enn lelefan invizib
dan vant enn serpan boa. Ala sok lor moi! Tibout
bonom fann ar moi.
- Non! Non! Mo pa'le enn lelefan dan enn boa. Enn boa li danzere. Enn lelefan
bar tro boukou plas. Kot moi peyna boukou plas. Mo bizin enn mouton. Ale tonton,
desinn enn mouton pou moi.
Mo ti desinn enn mouton. Li ti get li bien, lerla:
- Non, li tro malad. Fer enn lot.
Mo fer enn lot.
Mo ti kamoid fer enn ti sourir, vadire li pa'le
mo gagn latet:
- Tonton! Pa enn mouton sa! Enn bouk sa! Gete,
li ena korn …
Mo ti refer desin la me li ti rezet li kouma
lezot:
- Li tro vie tonton. Mo'le enn ki pou viv lontan.
Pou fini kourt ar li parski mo ti prese pou demont
mo moter, mo grifonn enn kes ar troi ti trou.
- To mouton dan kes la.
Alala! Piti la so figir ti eklere ar boner.
- Samem ki mo ti ole. … To koir li manz boukou lerb?
- Kifer?
- Kot moi peyna boukou plas.
- Pa traka, mo'nn donn toi enn bien tipti mouton.
Li ti yam desin la bien.
- Mo pa trouv li tipti, moi. … Ayozoto! Li finn dormi …
Ala kimanier mo ti zoinn mo Ti-Prins.
|
