Ti-Prins ti dir:
- Bonzour.
Operater saydinn ti reponn:
- Bonzour.
- Ki to pe fer?
Operater saydinn ti reponn:
- Mo ramas bann voiyazer par bach mil e enn kou mo avoy zot trin agos e enn kou
adroit.
Enn trin expres ilimine, ar so tapav loraz fer kabinn saydinn tranble. Ti-Prins
ti trouv sa drol:
- Zot bien prese. Ki zot ole?
- Sofer trin lamem pa kone.
Enn lot trin expres mem parey ti pas dan lot direksion. Ti-Prins ti rod kone:
- Ale, vini timama la?
- Pa mem trin sa. Enn lot.
- Bann pasaze finn sanz trin?
- Dimoun zame satisfe.
Enn troiziem expres ilimine pase atout vites.
- Troiziem pe souiv premie?
- Non! Zot pa kone ki zot pe fer. Ena pe dormi, ena pe baye. Zis bann zanfan,
nene plake lor vit, get lavi pe deroule.
Ti-Prins ti dan so pla:
- Zis zanfan ki kone ki zot anvi. Zot donn enn poupe tou zot letan. Poupe la
vinn inportan. Si to ras li zot plore.
