Apre ki Ti-Prins ti finn marse pandan lontan
atraver dezer, laplenn ros ek lamer lanez, anfin
li ti dekouver enn larout. Larout normalman amenn
kot dimoun reste. Ti-Prins trouv enn zardin roz:
- Bonzour.
Bann roz ti reponn:
- Bonzour.
Ti-Prins ti get zot bien. Zot tou ti resanble so fler. Li trouv sa drol:
- Ki zot ete zot?
- Nou, nou bann roz.
Ti-Prins ti santi enn tristes may li. So fler ti dir li ki li ti inik dan liniver.
La divan so lizie ti ena, dan mem zardin, mil fler parey. "Ayo, li pa pou
kontan kone seki mo kone. Li pou touse for-for koumadir li pe mor pou pa perdi
fas. Moi lor la mo pou bizin fer sanblan okip li serye-serye, tansion vremem
li larg lekor, ale."
" Mo enn zokris. Mo ti koir mo enn jak parski mo fler ti inik, lergete li
zis enn roz ordiner. Ki mo ena? Enn fler ki pa inik, troi volkan pa pli ot ki
mo zenou, enn ladan finn kikfoi fini mor net. Mo enn bachara, pa enn prins."
