Ti-Prins ti mont lor enn montagn bien-bien ot.
Avan sa, montagn ki li ti kone ti so troi volkan
ki ti ariv oter so zenou. E souvan li ti pe asiz
lor volkan mor la koumadir lor enn stoul. " Lor
latet sa montagn la mo sir mo pou trouv planet
la net e anmemtan tou bann dimoun." Me ler
li ariv lao li ti zis trouv bann zegoui ros bien
fite pe mont ver lesiel. Li sey koze:
- Bonzour.
Eko ti sort depi partou:
- Bonzour. … Bonzour. … Bonzour.
- Ou ki ou?
- Ou ki ou? … Ou ki ou? … Ou ki ou?
- Nou vinn dos. Mo peyna personn …
- Peyna personn … peyna personn … peyna personn …
Ti-Prins ti trouv sa drol: " Li dan douk sa planet la! Soi li sek net, soi
li point net, soi li sale net. So bann abitan zot katorz vintwit. Zot nek repet
seki dir zot. Kot moi mo ti ena enn fler. Kouma mo paret li ti koz ar moi."
