Ti-Prins ti travers dezer e lor so sime li ti
zoinn zis enn fler. Enn ti fler nanye ditou ar
troi petal. Ti-Prins ti dir:
- Bonzour.
Fler la ti reponn:
- Bonzour.
Ar boukou polites Ti-Prins ti dimann li:
- Kot bann dimoun ete?
Fler la ti rapel ki enn foi li ti trouv enn karavann pase.
- Dimoun? Mo koir ena sis ou set. Bien lontan mo ti kroiz zot. Nepli kone kot
zot ete. Divan sarye zot. Zot peyna rasinn. Enn problem sa.
Ti-Prins ti desid pou tir:
- Salam.
- Salam.
