Kan nou'le fer linteresan parfoi nou oblize koz
enn ti manti. Ler mo'nn koz lor bann gardien mo'nn
ekzazere inpe. Sa kapav donn enn fos linpresion
bann dimoun ki pa konn planet Ter. Anverite bann
imin pa pran boukou plas lor planet la. Si nou
met sa de miliar dimoun la enn akote lot kouma
dan miting piblik, zot pou okip enn laplas vin
mil par vin mil, pa plis. Pou ena ase plas pou
zot tou lor enn ti lil.
Pa sey fer bann gran dimoun konpran sa, ou pou perdi ou letan. Zot koir zot mari
inportan, ki zot tal zot personn kouma baobab. Konsey zot fer adision la. Zot
kontan zoue ar sif; zot pou gagn jos. Me pa gaspiy letan fer devoir initil. Fer
moi konfians plito!
Ler Ti-Prins ti debarke lor Ter, li ti gagn sok. Pa ti ena personn. Li ti koir
ki li ti perdi sime dan lespas. Enn sans li trouv enn bag kouler lalinn bouze
dan disab. Pou sey enn kou, li ti dir:
- Bonn-noui.
Serpan ti reponn:
- Bonn-noui.
- Siyouple, lor ki planet mo ete?
- Lor planet Ter ousa Later … dan Lafrik.
- Be … be, peyna dimoun lor Later?
- Isi nou dan dezer. Dan dezer peyna dimoun. Pa bliye, Later bien gran.
Ti-Prins ti al asiz lor enn ros e ti get lao dan lesiel:
- Kikfoi ena lalimier dan zetoil pou ki sak dimoun kapav trouv so prop zetoil.
Get mo planet laba, zis lor nou latet. Ayo li loin!
- Me li zoli. … Ki to finn vinn fer isi?
- Mo pe gagn problem ar mo fler.
- Aaannn!
- Kot bann dimoun? Lavi inpe tris-tousel dan dezer.
- Lavi kapav tris-tousel parmi dimoun 'si.
Ti-Prins fixe li pandan enn bon bout letan:
- To enn zanimo drol. To mins kouma mo ti ledoi.
- Me mo pli pouisan ki ledoi enn leroi.
Ti-Prins fer enn ti sourir.
- Pouisan? To peyna lipie … to pa kapav voiyaze.
- Si mo'le mo kapav amenn toi pli loin ki enn navir kapav amenn toi.
Li ti nek tourn otour sevi Ti-Prins kouma enn brasle an-nor. Lerla li ti dir:
- Kan mo tous kikenn, li retoun later kot li ti sorti. Me toi to prop e to sorti
dan enn zetoil …
Ti-Prins ti res trankil. Serpan la ti kontinie:
- Mo sagrin toi. Toi ki feb ek frazil lor Later, planet granit. Si enn zour to
anvi retourn dan to planet, vinn get moi. … Mo pou ed toi …
- Mo'nn bien konpran
toi. … Me kifer to
toultan koz koze misterye?
- Mo fer mister vinn kler.
