Se Ter ki ti setiem planet ki li ti vizite. Sa
li pa ti enn ninport. Lor planet Ter ti ena san
onz leroi, kalite lor kouler; ti ena osi set mil
zeograf, nef san mil biznesmenn, set milion edmi
laraker-deler, troi san onz milion vantar. Total
apepre de miliar gran dimoun.
Pou ou gagn enn ti lide grander planet Ter, mazine ki avan invansion elektrisite,
ti ena, lor tou bann kontinan met ansam, enn larme kat san soisannde mil sink
san onz gardien lanpader.
Depi enn distans sa ti extra zoli pou gete. Mouvman
sa larme la ti regle kouma enn bale dan teat.
Premie dabor se bann gardien lanpader Ostrali
ek Nouvel-Zeland ki ti koumanse. Zot ti alim
zot lanpader e lerla zot ti al dormi. Lerla
se bann gardien lanpader Lasinn ek Siberi ki
ti rant dan sega e apre zot ti al kas enn poz
dan koulis. Zot ti les lasenn ar bann ki dan
Larisi ek Lenn. Apre bann Lafrik ek Lerop;
apre bann Lamerik Disid; apre Lamerik Dinor.
Zame zot ti rat zot tour. Spektak feerik!
Me dan Pol Nor ek Pol Sid ti ena enn sel gardien sakenn e nou de konper ti
dan mangann diwana-mastana. Zot ti travay zis de foi par an.
