Troiziem planet ti abite par enn laraker. So
vizit ti mari kourt me ti fer Ti-Prins vinn tris.
Li ti trouv laraker la trankil divan enn ta boutey
vid ek enn ta boutey plin.
- Ki to pe fer?
Li ti reponn kouma enn zako sagrin:
- Mo pe boir enn tipti.
- Kifer to boir larak koumsa?
- Pou bliye.
- Ki zafer to rod bliye?
Ti-Prins ti pe koumans sagrin li. Misie laraker ti bes so latet ler li ti pe
koze.
- Pou bliye mo laont.
- Kifer to onte?
- Akoz mo tro boir.
Li ti kler ki misie la ti finn deside pou aret koze. Ti-Prins ti realize ki li
ti bizin tir. Tousa ti pe manz so krann pandan so voiyaz: "Pappa O! Sa bann
gran dimoun la, zot bizar depas kad. Fouf!"
