Si-zan finn fini pase. Mo pa ti rakont sa zistoir
la. Bann kamoid ki ti retrouv moi ti kontan ki
mo ti ankor vivan. Mo ti tris, mo dir zot, parski
mo ti fatige.
Kapav dir ki aster douler la moin for. Anfin, dizon!
Mo kone ki li finn retourn dan so planet parski
ler soley leve so lekor ti nepli la. Pa ti enn
lekor lour. … Asoir
mo kontan ekout bann zetoil. Zot sone kouma sink san milion ti laklos.
Me enn kou enn zafer extraordiner arive. Mo al rapel ki mo ti bliye met enn kordon
ar mizelier la. Pa pou kapav atas li. Ki pe ariv so pov planet? Eski mouton la
finn manz fler la? Parfoi mo dir non. Sirman Ti-Prins finn met bol transparan
lor fler la. Mo sir li vey bien mouton la. Lerla mo leker kontan e mo ekout bann
zetoil riye dousma.
Me parfoi mo panse: "Fasil bliye. Kikfoi
li'nn bliye met bol la. Kikfoi mouton la trakil
asoir finn sorti dan so kes." Lerla mo tann
bann ti laklos plore.
Tousa bien misterye. Pou ou kouma moi (parski nou
kontan nou ti prins) nanye nepli parey si koumadir
kikpar, ninport ki kote, enn mouton ki nou pa kone,
sipa wi sipa non, finn kapav manz enn roz…
Nek get lesiel e poz ou sa kestion la: mouton la finn manz fler la ousa non?
Nek gete lerla kouma tou sanze…
E okenn gran dimoun pa pou konpran zame ki tousa bien-bien inportan.
