DIKSYONER ELEKTRONIK ONNLAYN INTER-AKTIV
KREOL MORISYEN - ANGLE
Sa Diksyoner Elektronik Onnlayn Inter-aktiv KREOL MORISYEN-ANGLE
la li baze lor enn travay kolektif ki finn kumanse an 1982
dan enn lorganizasyon apel Ledikasyon pu Travayer e
ki pe kontiyne zordi dan enn nuvo form.
An 2004, dan enn rankont ant enn manb LPT ek
Krishna Thirapathi depi www.kiltir.com, lide ti pran nesans
pu prepar enn versyon elektronik diksyoner, e fer li vinn onnlayn.
Sa lide la finn devlope pandan enn an sak fwa
manb LPT ti zwenn ansam ar www.kiltir.com.
Dusman-dusman
lide pu fer diksyoner inter-aktiv ti pran nesans.
Kumsa ki Su-Komite Diksyoner ti pran nesans dan LPT, pu met
diksyoner dan form elektronik, e pu kordinn travay avek websayt.
Si u anvi donn kudme, klik lor seksyon web KI ETE LEDIKASYON
PU TRAVAYER?
KI ETE LEDIKASYON PU TRAVAYER
Ledikasyon pu Travayer enn lasosyasyon ki ador langaz
Kreol Morisyen. Anfet, so manb ador tu langaz maternel.
Zot inn ariv kone ki se atraver langaz maternel ki nu devlop
nu fason reflesi.
Alor, natirelman, zot anvi nercher langaz Morisyen maximem
posib. Li enn travay pasyonan, ki bizin buku dimunn donn kudme.
Kuma u-mem. Si u interese.
Samem LPT pe invit u pu partisip dan devlop langaz Kreol
Morisyen ekrit.
Ledikasyon pu Travayer inifye ansam dimunn ki anvi
edik zot-mem, promuvwar langaz maternel, partaz konesans, promuvwar
lar ek literatir Morisyen, ek osi partisip dan emansipasyon
travayer. LPT fer kur alfabetizasyon adilt, li fer tiycher
treyning pu literesi, e li donn kur pu dimunn ki deza letre
dan lezot langaz lor How to Write Mauritian Kreol Properly.
Ena osi bann ti-kur lor gramer langaz Kreol. Detanzantan, LPT
osi fer kur pu etranze ki anvi aprann koz Kreol Morisyen.
An 2004, LPT resevwar PRI MONDYAL UNESCO PU LITERESI. Li
osi pli gran peblisher an Kreol Morisyen.
LPT ena plizir su-komite ki pe travay
lor diferan laspe langaz Kreol Morisyen ek literesi. Enn
li lor “terminolozi”,
enn lor “pedagozi”, e seki konsern sa sayt la,
enn lor “diksyoner”.
Dan sak su-komite ena manb LPT plis dimunn
ki interese dan aprofondi sak travay. “Su-komite Terminilozi” konsern
sirtu formalizasyon langaz existan ek lakey nuvo mo dan langaz
Kreol Morisyen dapre prinsip teorik deza etabli.
Dan kad sa travay “terminilozi” la,
LPT deza form parti dan enn travay Pan-Afriken dan ACALAN
(Academy of African Languages).
Rada Kistnasamy pe kordinn sa travay la, onivo Moris ek Lafrik,
pu LPT.
“Su-komite Pedagozi” li viz
pu aprofondi ek kodifye nuvo metod anseyn literesi, ki pran
ankonsiderasyon lexperyans 30 an ki LPT ena. Alain Ah-vee
kordinn sa su-komite la.
“Su-komite Diksyoner” li viz
epdeyt ek amelyor diksyoner LPT ki ti pibliye pu premye fwa
an 1984 anform liv. Li finn met Diksyoner dan form elektronik,
li pe viz kordinn travay otur web avek Krishna Thirapathi
depi www.kiltir.com. Kisna Kistnasamy pe kordinn sa su-komite
la.
Si u anvi donn kudme dan nenport ki sa bann su-komite la,
avoy LPT enn e-mel lor lptmail@intnet.mu. U kapav osi ekrir
zot: Sekreter, LPT, 153 Main Road, Gran Rivyer Nord Wes,
Port Louis, Mauritius. Ubyen sone lor 208 2132.
Sa Diksyoner
Elektronik Inter-Aktiv li finn lanse a lokazyon Zurne Mondyal
Langaz Kreol 2005. Premye Edisyon Diksyoner LPT ti pibliye
an 1984 an form enn liv 250 paz, e finn riprinnt omwen 5
fwa.
Nu dan www.kiltir.com pe invit u donn kudme dan devlop sa
Diksyoner ansam ek Ledikasyon pu Travayer.
|